Kim Chui/Gerald Anderson - Movie Shooting Na

This week na ang simula ng shooting ng directorial film debut ni Direk Lino Cayetano under Star Cinema na pagbibidahan ng loveteam nina Kim Chiu at Gerald Anderson.

Nang makatsika namin si Direk Lino sa presscon kamakailan ng senatoriable brother niyang si Alan Cayetano ay nabanggit niyang wala pang titulo ang teen romance flick na sinulat ni Mel Mendoza-del Rosario.

Ani Direk Lino, two weeks ago ay nag-bonding na sila nina Kim at Gerald at very excited na siya sa kanyang first movie na dream come true para sa kanya.

Very dedicated daw sina Kim-Gerald sa gagawin nilang pelikula kung saan ibang level na ang ipakikita ng dalawang bagets.

Nabanggit din sa amin ng guwaping na rumored boyfriend ni KC Concepcion na may dinirek siyang isang TV show sa Singapore. May cute na kuwento si Direk Lino tungkol dito.

Tuwing punta raw niya ng Singapore, kapag dumaraan siya sa immigration ng airport ay pinatatabi siya sa isang gilid at todo-kapkap sa kanya ang airport authorities.

Malamang daw, ang akala ng mga ito ay isa siyang `bum' o tambay na walang trabaho dahil palaging kaswal lang ang suot niya at mahaba pa ang kanyang buhok.

Natawa rin siya sa mga nakatrabaho niya roon dahil asiwang-asiwa pala ang mga ito sa suot niyang torn jeans (pantalon na may mga butas na sadyang tinastas).

Sa isang buwan at kalahating pagtatrabaho niya roon ay halos ganu'n daw ang suot niya araw-araw, hindi niya alam ay pinagtitinginan pala siya dahil sa torn jeans niya.

Nabanggit lang ito sa kanya ng isa sa mga host ng show nu'ng maghihiwa-hiwalay na sila.
Katwiran ng Singaporean host, hindi pa raw kasi sila close kaya hindi nito masabi kay Direk Lino na hindi uso roon ang ganu'ng klaseng pantalon kaya usap-usapan ng lahat ang torn jeans niya. Ha! Ha! Ha! Splash Zone ang pamagat ng kiddie show na dinirek niya roon na kasalukuyang ipinalalabas
(tuwing Linggo) sa Kids Central TV network ng Singapore.

Ang Nickelodeon channel dito sa `Pinas ang nagsabi kay Direk Lino na magpadala siya ng demo
tapes doon dahil naghahanap ng Filipino TV director ang Singapore.

Sobrang bumilib sa kanya ang mga tagaroon nang mapanood ang trabaho niya sa StarStruck Kids
(ng GMA) at Little Big Star (ng ABS-CBN) kaya agad siyang ipinatawag.

Tsika ni direk, mayaman ang Singapore pero hindi sila marunong gumawa ng malalaking TV productions kaya manghang-mangha sila sa local shows natin tulad ng ASAP at ating mga teleserye.

Naturingang doon ang regional base ng National Geographic at MTV Asia pero sanay lang daw sila sa small productions na one-cam ang ginagamit kaya bilib na bilib sila sa husay ng mga Pinoy.

Kung ikukumpara ay mas malaki pa rin daw ang TF ni Direk Lino rito sa atin pero tinanggap niya ang nasabing trabaho sa Singapore for the experience.

Tatlo lang silang Pinoy sa dinirek niyang show roon (siya, isang writer at isang host na radio DJ dito sa `Pinas) at lahat na ay pawang Singaporeans.