Kim, malas kay Gerald?

Malas daw si Kim Chiu kay Gerald Anderson? Malas daw, dahil nu`ng
birthday ni Kim kamakailan, ni wala man lang iniregalo si Gerald sa dalaga.

"In fairness, before my birthday tinatanong naman ako ni Gerald kung
anong gift ang gusto ko. Hindi naman importante sa akin `yung material, eh. Actually, sumama na siya sa asalto sa akin ng mga fans nu`ng birthday ko, kaya okey na po `yon," sabi ni Kim.

Sabi namin kay Kim, iba pa rin `yung nagi-effort ang isang lalake na
magregalo sa isang babae. Ang ibig sabihin lang nu`n, may panahon ang
lalake na bigyan ng importansiya ang babae, kapag nagawa niyang bumili
ng regalo.

"Siguro, may gift pa rin siya, baka hindi pa lang niya ibinibigay. Lagi naman kaming magkasama, eh," sagot ni Kim.

Sa tingin ba ni Kim ay magiging malas din siya kapag nakarelasyon na niya si Gerald?

"Sa tingin ko, magiging happy ako sa kanya dahil mahilig siyang magpatawa. Tapos, gentleman pa siya. Maalalahanin pa siya.

"Although medyo moody siya kapag inaantok siya, mabait pa rin po siya. Parati siyang bumibili ng pagkain para sa amin," depensa ni Kim kay Gerald.

Hindi ba niya naisip na baka paiyakin lang siya ni Gerald, lalo na at may reputasyon ito na babaero?

"Selosa ako, kaya baka palagi lang kaming mag-away kapag naging babaero talaga siya. Nakakatakot talaga `yung ganu`n. Pero, ayoko munang isipin `yung mga ganu`n.

"At saka, alam naman natin na lahat ng tao ay puwedeng magbago, `di ba?

"Pero, huwag po muna ngayon. Siguro, kapag 18 na ako, doon na lang ako makikipag-boyfriend. Sa ngayon kasi, mahirap pagsabayin ang career at love life, eh."

Kunsabagay, matapos ang Sana Maulit Muli, sasalang na agad sina Kim at Gerald sa pelikula na ididirek ni Lino Cayetano, at isinulat ni Mel del Rosario. Cute ang kuwento ng pelikula nila, dahil parehong Alex Reyes ang pangalan nila rito.

`Yun nga lang, wala pa ring kissing scene sina Kim at Gerald sa pelikula nila sa Star Cinema. Bawal pa rin daw kay Kim, at base `yon sa bilin ng kanyang amang Intsik.

Samantala, nalungkot si Kim nang malaman niya na nahuli at ikinulong ang tatay ni Sandara Park kamakailan. Nalungkot din si Kim dahil may mga nagsasabi na siya ang dahilan kung bakit nawalan ng career si Sandara.

"Hindi ko po alam `yung nangyari sa kanya. Pero, hindi naman po ako ang dahilan kung bakit siya nawalan ng trabaho. Nandiyan pa rin naman po si Sandara.

"Pero, nakakaawa po siya, dahil `yung problema ng tatay niya, problema na rin niya. Sana po maging maayos ang sitwasyon ni Sandara," sabi na lang ni Kim.